Wisten jo dat...

Juny 2011

jo de Linepraat al wer in hiel jier foar nul sinten gratis en fergees yn’e bus krigen hawwe?
dit allinne mar kin tanksij de fêste ferieningsbydrage en ús grutte groep advertearders?
wy fansels ek in rekkennûmer hawwe foar de frijwillige bijdragen (mei tank yn’t foar!)356252612
it spitich wie dat de fytstocht ta gelegenheid fan de 100 jier Blauwe Tinte sok min waar trof?
it dy dei reinde en waaide dat it rikke en foar guon minsken de tocht letterlik suver yn’t wetter foel?
de folgjende jubileumtocht (oer hûndert jier) mar net wer oer de smelle betonpaadsjes moat?
Julius Huistra op de topskoarerslist fan ús gemeentlike fuotbaltiims op it fyfde plak einige is?
Dokkumer Syb syn rêst, mar ek nije enerzjy fynt yn de Greidhoeke: efkes resette oan de Swette?
der gelokkich noch altyd minsken binne dy’t spesjale krantestikjes yn myn brievebus goaie?(DSB53)
sokke stikjes gean oer (ynwenners fan) de trije doarpen, mar net opfallend yn de LC steane?
Hille Bergsma, tiimlieder fan Donia State yn Stiens de oarkonde krige foar it “leukste uitje”?
de bernebuorkerij, rund troch minsken mei in ferstânlike handikap, earder yn de Greidhôf siet?
it noch al wat fuotten yn’e ierde hie ear’t ‘it spotsje’ fan de bistedokter opnommen wurde koe?
âld-Redúster Monte Huizinga de ôfrûne moanne(n) hjir haadregisseur wie fan “Doch it foar…”?
hy him de fuotten ûnder it liif wei rûn hat, hearlik entûsjast wie, mar in prachtige tiid hân hat?
soks foar mear minsken jildt, it grutte barren tige slagge is, mei de kompliminten fan de Linepraat?
it moaiste yn myn eagen is dat it droegen waard troch, mei permisje, in net alledeiske organisaasje?
de keatsclub hiel orizjineel út ’e hoeke kaam mei in prachtige, suver oangripende, ‘welpen PC’ ?
Sjongnocht “hoffotograaf” Piet Elzinga betanke en him ferearde mei in nij fototastel ?
Friens syn eigen húske-karre hat en de wein foar ’t earst brûkt is op’e brulloft fan Peter en Wietske?
dy wein sa goed foldie, dat er no troch oare ynstânsjes hierd wurde kin (Doarpsbelang Friens)?
yn Friens de postkoade strjittepriis fallen is en men mei-inoar nei André Rieu yn Amsterdam koe?
it lang ferlyn is dat der sa’n grutte bus de âlde Middelseedyk del riden is?
de jeu-de-pelote ploech fan Reduzum yn de earste omloop fan it FK fan Makkum wûn hat ?
men it yn de twadde omrin sûnder Piter (siet fêst yn de Skobberdebonk) net rêde koe ?
kuorbalferiening MidFryslân snein syn kampioensresepsje hold en de Grouster kantine fol wie?
de keatsclub Jan Reitsma wer hiel orizjineel út deselde hoeke kaam ?
de kuorballers in skeppe krigen, dy’t no wol nedich wêze sil foar de oanlis fan it keunstgersfjild?
it hiel moai is dat de sportferienings mei-inoar de lêste jierren maklik troch deselde doar rinne?
de keninginne ferline wike tasein hat dat se mei de merke yn Reduzum der ek by wêze sil?
doe’ t Bea dy sneons foar de televyzje kaam, it apparaat by Tsjerk en Anneke spontaan knapte?
dyselde sneons by Jan en Doet Vollema in prachtige fôle it libbensljocht seach?
ús jonge fuotballers moai waar hiene doe ’t se mei de bus nei Denemarken wiene foar in toernoai?
Anneke Boersma en Durk van Gorkum tegearre in konsert foar fioele en oargel fersoargen?
dit ferline wike snein barde yn de tsjerke fan Friens ta gelegenheid fan de Greidhoeketsjerkedei?
ôfrûne snein al wer in bysûnder barren wie yn tsjerke, doe’t ôfskie nommen waard fan Carl Visser?
de Kerkenpad-kommisje drok dwaande is mei de útstalling fan skilderijen fan Gauke Hof ?
ferskillende minsken in echte Jaguar yn it lân seagen, doe it gers oan de strjitwei ynhelle waard?
famylje Bijl efkes útstapte en fertrêde by in Raststätte oan in Dútske snelwei en dêr in tas fûn?
dy tas iepen gie en bliken die, dat dy thúshearde by âld-Redúster Rigtsje de Vries?
der no al kûgelgatten sketten binne yn de oanplakbiljetten fan de American Summer yn Idaerd ?

terug print