Wisten jo dat...

Jannewaris 2010

yn dizze Linepraat wer in pear hiel bysûndere ferhalen tusken it reguliere nijs steane?
der in prachtich ferhaal yn stiet fan Baukje W. oer sidekrûp-boartsjen op’e Haven?
der ek in nijsgjirrich ferhaal fan Klaas de Groot yn stiet, optekene troch Minne van der Sluis?
dit lêste ferhaal in ferfolch kriget yn it febrewarisnûmer?
de toanielspilers yn alle doarpen yn de startblokken stean en jo mar útsykje kinne ?
datselde jildt foar de jiergearkomsten, dizze LP tilt der wer fan op !
Harm Smit al in skoftke ferlyn selektearre is foar it Noardelik jeugdkuorbalteam?
broer Hattum him dêr no ek yn spile hat en heit Andries alle war docht om ek sa fier te kommen?
begjin jannewaris in ploech tritigers moarns ier ôfreizge om op wintersport te gean?
der nei in oere al in SMS-ke bij it thúsfront oankaam: we sitte bij Akkrum fêst yn ‘e snie?
dyselde snie der foar soarge dat it personiel fan skoalle de earste trije dagen fan it nije jier manmachtich moarns foar healwei achten bij skoalle al oan it snieskowen wie?
Henny Hof de hiele winter de stoepen bij de senioarewenten sniefrij holden hat?
der yn Idaerd safolle snie lei, dat Tsjipke sniekettings foar de trekker bestelde?
it materiaal pas kaam doe’t de snie(hast) fuort wie en hy no mar sit te wachtsjen op nije snie?
der mar gjin ein oan dy snie komt en dêrtroch it riden neat wurde kin?
Tsjipke no dochs mei syn reade trekker lekker troch Idaerd syn ritsjes makket en alles skjinfaget?
de iisklup op alle mooglike wizen besiket de leden iis foar harren jild te jaan?
de Zumba-raazje ek yn de trije doarpen hearsket en jo jo opjaan kinne by Afke.
it âldste echtpear fan Reduzum, Evert en Boukje Wieling, nei Weidum ferhuze is?
de gemiddelde leeftyd yn it doarp hjirtroch grif in hiel stik nei ûnderen gongen is?
der in man út Raerd op jacht is nei in pear grêfstiennen, dy’t op ien as oare wize hjir bedarre binne?
de Halbertsma-priis foar it bettere sneupwurk al ris earder hjir terjochte kommen is?
de stiennen nei alle gedachten wol fûn binne, mar út piëteit mei de rêch omheech lizze?
de Stânfries-gymnasten ôfrûne freed in geweldige show fersoargen yn de gymseal?
de seal grôtfol siet, de moaiste kleuren en passende muzyk alle aksjes aksintuearren?
ek de dammers fan de middenbou harren fan de goeie kant sjen litten hawwe?
hja as lêste einigen yn de earste en de twadde foarronde, dêrtroch yn de C-klasse kamen?
tredde waarden yn de heale finales, mar wól kampioen fan Fryslân wurden binne?
men soks “pike op it goede momint” neamt, faaks kin it in nij fak op skoalle wurde?
kommende sneon grif ek wer pykt wurde moat op de biljertmaraton yn ús doarpskafee?
Wiebe van Marrum yn maaie fia syn skoalle nei Rwanda giet foar ûntwikkelingshelp?
dêr bygelyks skoaltsjes opknapt wurde sille en hy sponsors siket foar dit projekt?
we sneon wer del komme om (grif in hiele protte) papier op te heljen?

terug print