Wêr bliuwt de tiid

Minsken fan no kinne en witte folle mear as eartiids, tinke wy.

Wy ha kompjoeters, maile en googleje krekt as hawwe we nea oars dien. We ride auto’s en fleane mei fleantugen.

Allegear witte we dat dit oh sa ferkeard is foar ús miljeu, mar we wolle en kinne net werom yn’e tiid. Tuurlik rinne en fytse we wol, mar dan foaral rekréatyf of om der sûner fan te wurden.

Oan de oare kant wurdt der wat moade en hûsynrjochting oangiet werom grypt nei âlde tiden. Rinne we wer yn yn houtsje-toutsje jas of yn in keep, wide pipen yn’e broek en breiden truien. As je de breiden truien nea ôfskaft ha, dan sit je no wer goed.

Doe’t wy in lytse 30 jier tebek nei Reduzum ferhúzje soene begûn ik mei it haken fan in flierkleed, hiele dikke wol en mei in grutte haaknulle (it is spitigernôch nea ôfkaam, fan it haken krige ik in peesûntstekking yn’t skouder). Mar no binne der wer flierkleden haakt of breide fan dikke wol.Dat werom komme op âlde dingen is dat no nostalgy of in te min oan fantasy? Elts hat no ek wer grutte fytstassen, jierren wie it wol sa âlderwetsk. Mar sa as no blykt dochs wol hiel handich.

By bisten leit it dochs in bytsje oars. Eartiids rûnen hûnen fuort en kamen nei in skoftke wol wer thús: dogge dy fan ús no ek. Een ezel stoot zich niet tweemaal aan dezelfde steen: docht ús ezel ek net. Sy is 2 wike lyn mei 7 man/frou nei binnen treaun. Se doarde net troch de doar. Poezen sykje harren eigen plakje út om te lizzen. In swart-wite poes is spot yn ús dowehok. Minsken dogge it ek wolris as de bisten. It jout sekerheid en je hoege gjin beslissings te nimmen.

Us eigen Linepraat is grien mei in waskline foarop. Is al jierren sa. By de measte huzen is it houtwurk grien-wyt. Altyd sa west. By ús wurdt it oars. De spinnen makket it gjin fluit út.

Ik fyn, je moatte ek ris wat oars yn’t libben.

No’t wy sa no en dan yn Ierlân binne, sjoch je hoe’t oare folken binne. It ferskil yn oansjen fan de minsken is dêr grut. Fan hiel âlderwetsk, oant suterich en oant super nuffich mei hege hakken fan 20 sintimeter.

Sa ha je moai wat om nei te sjen.

Oant oare moanne, Blijke

terug print